Biografía

Antía Yáñez (Burela, 1991) devorou libros como elemento principal da súa dieta na infancia e agora escribe como complemento alimenticio.

A súa primeira novela foi O misterio de Portomarín (Galaxia, 2016), que ten a súa continuación en O misterio do torque de Burela (Galaxia, 2019).

En 2018 gañou o Premio Illa Nova con Senlleiras (Galaxia) e o I Premio Fina Casalderrey de Literatura Infantil pola Igualdade co álbum ilustrado A reconquista (Baía). Ese mesmo ano quedou finalista do I Premio María Victoria Moreno de Literatura Xuvenil con Be Water (Cuarto de Inverno, 2019).

Outras obras súas son Plan de rescate (Xerais, 2019), Premio Agustín Fernández Paz pola Igualdade, seleccionada na prestixiosa lista IBBY 2023, Non penses nun elefante rosa (Xerais, 2022) e O clan das barbies (Xerais, 2024).

Colabora coa revista Luzes e Diario Público, e cos seus artigos de opinión acadou os premios Johan Carballeira de Xornalismo 2022 e o Mulleres que opinan 2024.

No 2025 foi galardoada co Premio Raíña Lupa de Literatura Infantil por Bragakadabra.